अटीतटीचा सामना, मोक्याच्या क्षणी सूर्यकुमारचा अविश्वसनीय झेल, कपिल ‘पाजी’ही चक्रावले!

म. टा. प्रतिनिधी, नागपूर : पंचतारांकित फलंदाज सूर्यकुमार यादव याने दक्षिण आफ्रिकेचा फलंदाज डेव्हिड मिलर याचा पकडलेला अविश्वसनीय झेल मॅचचा टर्निंग पॉइंट ठरला. तो क्षण सर्व देशवासीयांसाठी आनंदाचा होताच, पण नागपूरकरांसाठी काही खास होता. कारण, त्यावेळी असाच एक अविश्वसनीय झेल १९८३च्या क्रिकेट विश्वचषकाच्या अंतिम सामन्यात पकडणारे महान क्रिकेटपटू कपिल देव नागपूरकरांसोबत येथील आरपीटीएस परिसरात टी-२० विश्वचषकाचा अंतिम सामना पाहात होते.

१९८३च्या क्रिकेट विश्वचषकाच्या अंतिम सामन्यात कपिल देव यांनी मागे धावून जात वेस्ट इंडिजचे तत्कालीन कर्णधार सर क्लाइव्ह लॉइड यांच्या झेल पकडला होता. कपिल देव यांचा ८३चा झेल आणि सूर्यकुमार यादवचा शनिवारचा झेल दोन्ही स्पेशल.

कपील देव यांची प्रतिक्रिया काय?

विश्वचषकासाठी शनिवारी रात्री झालेल्या अंतिम सामन्यात शेवटच्या षटकाच्या पहिल्याच चेंडूवर दक्षिण आफ्रिकेचा फलंदाज डेव्हिड मिलरने मारलेला फटका सीमारेषेजवळ सूर्यकुमार यादवने अफलातूनपणे झेलला आणि तिथेच भारताने सामना जिंकला. सूर्यकुमारच्या या झेलाची तुलना कपील देव यांनी वर्ल्डकपमध्ये क्लाईव्ह लॉईड यांनी घेतलेल्या झेलासोबत होत आहे.

मुख्य म्हणजे शनिवारचा संपूर्ण सामना चढउताराचा होता. सामना जसजसा पुढे जात होता तसतसे कपिल देव यांचे हावभाव बदलत होते. त्यांच्यासोबत असलेल्या नागपूकरांसह त्यांची चर्चा सुरू होती. दरम्यान, ‘सूर्यकुमार यादव याने ज्यावेळी डेव्हिड मिलरचा झेल टिपला, त्यावेळी कपिल देव जागेवरून उठत उड्या मारणेच बाकी होते, इतका आनंद त्यांना झाला होता’, अशी माहिती कैलाश गोलेछा यांनी ‘मटा’शी बोलताना दिली.

संस्मरणीय क्षण

‘जितो’द्वारे आयोजित पगारिया जेबीएन महाकुंभ या विशेष परिषदेत कपिल देव यांचे सत्र होते. त्यानंतर त्यांनी विमानप्रवास करून परत जाण्याऐवजी नागपुरात मुक्काम करण्यास पसंती दिली. ते त्यांची निवासव्यवस्था असलेल्या ठिकाणी सामना बघू शकले असते. मात्र, त्यांनी तसे न करता देशाच्या वेगवेगळ्या राज्यांतून आलेले उद्योजक-व्यवसायी आणि नागपूरकरांसोबत एका भव्य डोममध्ये सामन्याचा आनंद लुटला. या आठवणी नागपूरकरांसाठी कायम संस्मरणीय असल्याची भावना व्यक्त करण्यात येत आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-07-01T02:33:51Z dg43tfdfdgfd