आयपीएलमध्येच बदल करा, पराभवानंतर भडकलेल्या गौतम गंभीरचे मोठे वक्तव्य

कोलकाता : केकेआरने २२४ धावा करूनही त्यांना पराभव पत्करावा लागला. या पराभवानंतर केकेआरच्या संघाचा मार्गदर्शक गौतम गंभीर चांगलाच भडकला आहे. रागाच्या भरात गंभीरने आता थेट आयपीएलमध्येच बदल करा, अशी मागणी केली आहे.

सुनीन नरिनने केकेआरसाठी धडाकेबाज शतक झळकावले होते. नरिनने या सामन्यात १०९ धावांची खेळी साकारली होती, त्यामुळेच केकेआरच्या संघाला १०९ धावा करता आल्या. पण राजस्थानच्या संघातील जोस बटलरने नाबाद १०७ धावांची खेळी साकारली आणि केकेआरच्या संघाला पराभव पत्करावा लागला. या पराभवानंतर गंभीर हा चांगलाच भडकला होता. रागाच्या भरात गंभीरने आयपीएलमध्येच बदल करण्याची मागणी केली आहे.

गंभीर म्हणाला की, " आयपीएलमध्ये छोट्या गोष्टींचाही मोठा प्रभाव पडतो. या छोट्या गोष्टींमुळेही एखाद्या संघाचा पराभव होऊ शकतो. त्यामुळे आयपीएलमध्ये एक मोठा बदल करावा लागेल, असे मला वाटते. . सध्या कुकाबुरा कंपनीच्या चेंडूने आयपीएलचे सामने खेळले जात आहेत. आयपीएलमध्ये कुकाबुराऐवजी ड्यूक कंपनीचा चेंडू वापरण्यात यावा, असे मला वाटते. जर एखादी कंपनी ५० षटकांचा चेंडू तयार करू शकत नसेल तर त्या कंपनीऐवजी दुसऱ्या कंपनीच्या चेंडूने खेळण्याची गरज आहे. आयपीएल सामन्यांमध्ये फक्त कुकाबुरा चेंडू वापरण्याची सक्ती का करण्यात येत आहे, हीच गोष्ट मला कळत नाही. त्यामुळे आयपीएलमध्ये एक मोठा बदल चेंडूची कंपनी बदलण्याचा करावा, असे मला वाटते. कारण या एका गोष्टीमुळे मोठा फरक पडू शकतो."

समालोचक हर्षा भोगले यांनीही गौतम गंभीरशी सहमती दर्शवली आहे. हर्षा म्हणाले की, "बॅट आणि बॉल मध्ये अधिक समतोल साधण्याची गरज आहे. विशेषत: जेव्हा खेळपट्ट्या गोलंदाजांना अनुकूल नसतात, तिथे चेंडू हवेत स्विंग झाला तर खेळ पाहण्याच रंजकता येऊ शकते. यासाठी ड्यूक चेंडूचा वापर करण्याबाबत काय वाटते. कारण चेंडू चांगला असेल तर गोलंदाजांनाही थोडी मदत मिळू शकते. त्यामुळे या गोष्टीवर चर्चा व्हायला हवी आणि तज्ञांनीही याबाबत आपली मते व्यक्त करायला हवी."

आयपीएलमध्ये जो चेंडू वापरला जातो, तो बदलण्यात यावा अशी मागणी आता गंभीरने केली आहे. याबाबत आता निर्णय घेतला जातो, याकडे सर्वांचे लक्ष नक्कीच लागलेले असेल. त्याचबरोबर बीसीसीआय किंवा आयपीएलची प्रशासकीय समिती याबाबत आपले मत व्यक्त करते का, याची उत्सुकताही चाहत्यांना नक्की असणार आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-17T14:54:29Z dg43tfdfdgfd