एकच वादा ऋतुराज दादा... शिवमसह गोलंदाजांची धुलाई करत २०० धावांचा पल्ला केला पार

चेन्नई : ऋतुराजचेच राज्य CSK vs LSG या सामन्यात पाहायला मिळाले. ऋतुराजने धडाकेबाज फटकेबाजी करत दमदार शतक झळकावले. ऋतुराजच्या शतकाच्या जोरावर चेन्नईच्या संघाने विजयाचा पाया रचल्याचे म्हटले जात आहे. कारण ऋतुराजच्या दमदार शतकाच्या जोरावर चेन्नईच्या संघाने २१० धावांचा डोंगर उभारला आहे. ऋतुराजने यावेळी ६० चेंडूंत १२ चौकार आणि आठ षटकारांच्या जोरावर नाबाद १०८ धावांची खेळी साकारली. ऋतुराजला यावेळी शिवमने चांगली साथ दिली. शिवमने यावेळी २७ चेंडूंत ३ चौकार आणि सात षटकारांच्या जोरावर ६६ धावा फटकावल्या. महेंद्रसिंग धोनीने एकच चेंडू खेळत चौकार वसूल केला आणि चाहत्यांची मनं जिंकली.

चेन्नईच्या संघाला अजिंक्य रहाणेच्या रुपात पहिलाच धक्का बसला. अजिंक्यला यावेळी एकच धाव करता आली. पण या धक्क्यातून संघाला बाहेर काढले ते ऋतुराजने. ऋुतराजलाही यावेळी ४ धावांवर असताना जीवादान मिळाले आणि त्याचा चांगलाच फायदा त्याने घेतला. जीवदान मिळालेल्या दुसऱ्याच षटकात त्याने दमदार फटकेबाजी करायला सुरुवात केली. पण यावेळी संघात स्थान दिलेल्या डॅरिल मिचेलला ऋतुराजला चांगली साथ देता आला नाही. सहाव्या षटकात मिचेल हा ११ धावांवर बाद झाला. मिचेलनंतर रवींद्र जडेजा फलंदाजीला आला आणि तो १७ धावांवर बाद झाला. ऋतुराज ही सर्व पडझड पाहत होता. पण तो थांबला नाही. कारण ऋतुराजने एका बाजूने लखनौच्या संघावर हल्लाबोल सुरुच ठेवला होता. एका बाजूने दमदार फलंदाजी करत ऋतुराजने अर्धशतक पूर्ण केले आणि तो शतकाच्या दिशेने निघाला.

ऋतुराजला यावेळी चांगली साथ देत होता तो शिवम दुबे. ऋतुराज आणि शिवम यांनी चौथ्या विकेटसाठी दमदार भागीदारी रचली. खासकरून १६ षटकात शिवमने यश ठाकूरला तीन षटकार मारत आपले इरादे स्पष्ट करून टाकले. १५ षटकांनंतर शिवम चांगलाच आक्रमक दिसत होता आणि ऋतुराज हा नव्वदीमध्ये दाखल झाला होता. ऋतुराजने यावेळी चौकारासह आपले शतक ५४ चेंडूंत पूर्ण केले. ऋतुराजच्या शतकानंतर शिवमचे अर्धशतकही पाहायला मिळाले. शिवमने यावेळी फक्त २१ चेंडूंत आपले अर्धशतक साकारले. अखेरच्या चार षटकांत तर ऋतुराज आणि शिवम यांनी तुफानी फटकेबाजी केली.

ऋतुराज आणि शिवम यांच्या धडाकेबाज फटकेबाजीमुळे चेन्नईला दोनशे धावांचा टप्पा ओलांडता आला.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-23T16:21:57Z dg43tfdfdgfd