केकेआरपुढे लखौनौचे लोटांगण, सुनील नरिनच्या तुफानी खेळीच्या जोरावर साकारला मोठा विजय

लखनौ : अव्वल कामगिरी कशी करायची, याचा उत्तम वस्तुपाठ केकेआरच्या संघाने दाखवून दिला. सुनील नरिनने वादळी खेळी साकारत संघाच्या विजयाचा भक्कम पाया रचला. त्यानंतर गोलंदाजांनी अचूक मारा करत केकेआरच्या विजयाचा कळस चढवला. सुनील नरिनच्या तुफानी फटकेबाजीच्या जोरावर केकेआरला २३५ धावांचा डोंगर उभारता आला होता. या आव्हानाचा पाठलाग करताना लखनौच्या संघाला धाप लागली आणि ते हे आव्हान गाठण्यात सपशेल अपयशी ठरले. त्यामुळेच केकेआरच्या संघाला लखनौच्या संघावर ९८ धावांनी मोठा विजय मिळवता आला.

केकेआरच्या २३६ धावांचा पाठलाग करताना लखनौच्या संघाला दुसऱ्या षटकात अर्शीन कुलकर्णीच्या रुपात पहिला धक्का बसला, त्याला ९ धावाच करता आल्या. त्यानंतर काही काळ लखनौचा कर्णधार लोकेश राहुल आणि मार्कस स्टॉइनिस यांची चांगली जोडी जमली. या जोडीने दुसऱ्या विकेटसाठी ५० धावा केल्या. पण हर्षित राणाने राहुला बाद करत ही जोडी मोडली, राहुलने यावेली २५ धावा केल्या. त्यानंतर स्टॉइनिसने काही काळ किल्ला लढवला खरा, पण तो ३५ धावांवर बाद झाला आणि लखनौला मोठा धक्का बसला. त्यानंतर लखनौचा संघ हा सामान गमावणार, हे जवळपास निश्चित समजते जात होते.

केकेआरने तुफानी फटकेबाजी करत लखनौच्या गोलंदांचा खरपूस समाचार घेतला. सुनील नरिन आणि फिल सॉल्ट या दोघांनी संघाला दणदणीत सलामी करू दिली. या दोघांनी ४.२ षटकांतच संघाला ६१ धावा उभारून दिल्या. फिल सॉल्टने यावेळी पाच चौकार आणि एका षटकाराच्या जोरावर फक्त १४ चेंडूंत ३२ धावांची खेळी साकारली. सॉल्ट बाद झाल्यावरही नरिनने फटकेबाजी सुरुच ठेवली आणि अपले अर्धशतक झळकावले. नरिन जोरदार फटकेबाजी करत होता, त्यामुळे त्याने शतकाच्या दिशेने कूच केली होती. नरिन या आयपीएलमध्ये दुसरे शतक झळकावणार, अशी आशा निर्माण झाली होती. पण रवी बिश्नोईने त्याला बाद केले आणि लखनौला मोठे यश मिळवून दिले. नरिनने यावेळी ३९ चेंडूंत सहा चौकार आणि सात षटकारांच्या जोरावर ८१ धावांची तुफानी खेळी साकारली.

नरिन बाद झाला तरी त्याने संघासाठी धावांचा भक्कम पाया रचला. नरिन बाद झाल्यावर केकेआरच्या अन्य फलंदाजांनी आक्रमक फलंदाजी केली. त्यामुळेच केकेआरच्या संघाला यावेळी २० षटकांत ६ बाद २३५ अश दमदार मजल मारता आली. केकेआरची ही धावसंख्या विजय मिळवण्यासाठी चपखल असल्याचे म्हटले जात होते.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-05T18:03:56Z dg43tfdfdgfd