टी-२० वर्ल्डकप संघातून कोणाचा पत्ता कट झाला? निवड समितीने घेतला कठोर निर्णय, या स्टार खेळाडूला डच्चू

नवी दिल्ली: आगामी टी-२० वर्ल्डकपसाठी भारतीय क्रिकेट संघाची घोषणा झाली आहे. कर्णधारपद रोहित शर्माकडे तर उपकर्णधारपद हार्दिक पंड्याकडे देण्यात आले आहे. वेस्ट इंडिज आणि अमेरिकेत १ जूनपासून सुरू होणाऱ्या या स्पर्धेत भारताची पहिली लढत ५ जून रोजी आयर्लंडविरुद्ध असणार आहे.

अजित आगरकर यांच्या अध्यक्षतेखालील निवड समितीने टी-२० वर्ल्डकपसाठी संघ निवडताना अनेक मोठे धक्के दिले आहेत. ज्यातील सर्वात मोठा धक्का म्हणजे केएल राहुलला स्थान न देण्याचा होय. निवड समितीने विकेटकीपर म्हणून ऋषभ पंत आणि संजू सॅमसन यांच्यावर विश्वास दाखवला आहे. मात्र फलंदाजीसोबत विकेटकीपरची जबाबदारी पार पाडणाऱ्या राहुलला वर्ल्डकप संघात स्थान मिळू शकले नाही.

राहुलसोबत शुभमन गिल आणि रिंकू सिंह यांना देखील झटका बसला आहे. त्यांना मुख्य संघात स्थान मिळाले नाही. मात्र राखीव खेळाडूंमध्ये जागा देण्यात आली आहे. स्पर्धा सुरू असताना मुख्य संघातील एखाद्या खेळाडूला दुखापत झाली किंवा अन्य कोणत्याही कारणामुळे तो स्पर्धेत बाहेर झाला तर राखीव खेळाडूंना संधी मिळेल. राखीव खेळाडूंमध्ये गिल, रिंकू सोबत खलील अहमद आणि आवेश खान यांचा समावेश आहे.

भारतीय संघात रोहित शर्मा, यशस्वी जयस्वाल, विराट कोहली, सूर्यकुमार यादव, शिवम दुबे असे पाच फलंदाज आहेत. विकेटकीपर आणि फलंदाज म्हणून ऋषभ पंत आणि संजू सॅमसन यांना संधी दिली गेली आहे. ऑलराउंडरमध्ये हार्दिक पंड्या, अक्षर पटेल आणि रविंद्र जडेजा हे तिघे आहेत.

गोलंदाजी विभागात कुलदीप यादव आणि युजवेंद्र चहल हे दोन फिरकीपटू आहेत. जलद गोलंदाजांमध्ये जसप्रीत बुमराह, अर्शदीप सिंग आणि मोहम्मद सिराज असे ३ खेळाडू आहेत.

टी-२० वर्ल्डकपमध्ये भारत ग्रुप ए मध्ये असून यात पाकिस्तान, आयर्लंड, कॅनडा आणि अमेरिका हे देश आहेत.

असा आहे भारताचा टी-२० वर्ल्डकपसाठीचा संघ - रोहित शर्मा (कर्णधार), यशस्वी जयस्वाल, विराट कोहली, संजू सॅमसन, सूर्यकुमा यादव, शिवम दुबे, ऋषभ पंत, हार्दिक पंड्या, रविंद्र जडेजा, अक्षर पटेल, कुलदीप यादव, युजवेंद्र चहर, जसप्रीत बुमराह, मोहम्मद सिराज, अर्शदीप सिंग

राखीव खेळाडू- शुभमन गिल, रिंकू सिंग, खलील अहमद, आवेश खान

भारताचे वेळापत्रक

५ जून- विरुद्ध आयर्लंड, न्यूयॉर्क

९ जून- विरुद्ध पाकिस्तान, न्यूयॉर्क

१२ जून- विरुद्ध अमेरिका, न्यूयॉर्क

१५ जून- विरुद्ध कॅनडा, फ्लोरिडा

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-30T11:13:16Z dg43tfdfdgfd