बुमराहने पर्पल कॅपसह रचला अजून एक अनोखा विक्रम, कोणालाही ही गोष्ट जमली नाही...

गोपाळ गुरव : आयपीएलमधील मुंबई इंडियन्स संघाचा कर्णधार जसप्रीत बुमराह सध्या चांगल्याच फॉर्मात आहे. यंदाच्या आयपीएलमध्ये पर्पल कॅपच्या शर्यतीत तो अव्वल आहे. कोलकाता नाइट रायडर्सविरुद्ध झालेल्या लढतीत त्याने अनोखा विक्रम केला.

शुक्रवारी मुंबई इंडियन्स संघ घरच्या मैदानावर अर्थात वानखेडे स्टेडियमवर कोलकाता संघाविरुद्ध खेळला. या लढतीत मुंबईच्या गोलंदाजांनी अचूक मारा करून कोलकात्याला १९.५ षटकांत १६९ धावांत रोखले. यात बुमराहने ३.५ षटकांत केवळ १८ धावांत तीन विकेट घेतल्या. बुमराहने एका बाजूने किल्ला लढविणाऱ्या वेंकटेश अय्यरचा त्रिफळा उडविला. अय्यरने ५२ चेंडूंत ७० धावा केल्या. यानंतर बुमराहने एकाच षटकात रमनदीपसिंग आणि मिचेल स्टार्कला बाद केले. यासह बुमराहची यंदाच्या आयपीएलमधील विकेटची संख्या १७ झाली आहे.

मात्र, बुमराहसाठी वानखेडे स्टेडियम नेहमीच भाग्यशाली राहिले आहे. आयपीएलमध्ये वानखेडे स्टेडियममध्ये सर्वाधिक ५१ विकेट घेणारा तो पहिला भारतीय गोलंदाज ठरला आहे. त्याआधी लसिथ मलिंगाने वानखेडे स्टेडियमवर ६८ विकेट घेतल्या आहेत. त्याचबरोबर बुमराहने आपल्या शिरपेचात आणखी एक मानाचा तुरा खोवला आहे. त्याने आयपीएलमध्ये एका डावात तीन किंवा त्याहून अधिक विकेट घेण्याची कामगिरी २३ वेळा केली आहे. अशी कामगिरी सर्वाधिक वेळा करणारा तो पहिला गोलंदाज ठरला आहे. ही कामगिरी त्याने १३१ डावांत केली आहे. त्याखालोखाल युजवेंद्र चहल (२० वेळा), लसिथ मलिंगा (१९वेळा), अमित मिश्रा (१७वेळा) यांचा क्रमांक लागतो. आयपीएलमध्ये सर्वाधिक विकेट मिळवणाऱ्या गोलंदाजांच्या यादीत बुमराह नवव्या क्रमांकावर आहे. त्याने १३१ सामन्यांत १६२ विकेट घेतल्या आहेत.

या आयपीएलमध्ये बुमराहने वानखेडेवर ११ एप्रिलला बेंगळुरूचा निम्मा संघ गारद केला होता. त्यानंतर त्याने याच मैदानावर दिल्लीविरुद्ध दोन विकेट घेतल्या होत्या. बुमराहचा हाच फॉर्म कायम राहिला, तर त्याचा फायदा भारताला आगामी वर्ल्ड कपमध्येही होणार आहे. टी-२० वर्ल्ड कपला एक जूनपासून विंडीज आणि अमेरिकेत सुरुवात होणार आहे. यात बुमराह भारताचा हुकमी गोलंदाज आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-05T11:32:51Z dg43tfdfdgfd