भारताचा टी-२० वर्ल्ड कपसाठी संघ जाहीर; रोहित शर्माच कर्णधार, हार्दिक पंड्याकडे दिली मोठी जबाबदारी

नवी दिल्ली : टी-२० वर्ल्ड कपसाठी भारतीय संघाची घोषणा आता करण्यात आली आहे. अजित आगरकर यांच्या निवड समितीने रोहित शर्मावर विश्वास कायम ठेवला असून त्याच्याकडेच कर्णधारपद ठेवले आहे. त्याचबरोबर काही धक्कादायक निर्णय यावेळी भारताच्या निवड समितीने घेतले आहेत. हार्दिक पंड्याची टी-२० वर्ल्ड कपसाठी निवड होणार का, याची जोरदार चर्चा होती. या चर्चेला आता निवड समितीने पूर्ण विराम दिला आहे. हार्दिककडे उपकर्णधारपद सोपवण्यात आले आहे.

आयपीएल संपल्यावर लगेचंच टी-२० विश्वचषकाच्या सामन्यांना सुरूवात होणार आहे. येत्या १ जूनपासून वेस्ट इंडिज आणि अमेरिका येथे टी-२० चे सामन्यांचे आयोजन होत आहे. या संदर्भात राष्ट्रीय निवड समितीचे अध्यक्ष अजित आगरकर आणि कर्णधार रोहित शर्मा व प्रशिक्षक राहुल द्रविड यांच्यात अनौपचारिक बैठक झाली होती. या बैठकीनंतर भारताचा संघ जाहीर करण्यात आला. रोहित शर्मा, राहुल द्रविड आणि अजित आगरकर यांच्यात काही नावांवर एकमत झाले नव्हते. आयसीआयने संघ जाहीर करण्यासाठी १ मेपर्यंतची वेळ दिली होती. त्यामुळे शनिवारी झालेल्या मुंबईविरूद्ध दिल्लीच्या सामन्यात कर्णधार रोहित शर्मासोबत संवाद साधण्यासाठी आगरकर थेट दिल्लीला पोहोचले होते.

भारताचा टी-२० वर्ल्डकपसाठीचा संघ- रोहित शर्मा (कर्णधार), यशस्वी जयस्वाल, विराट कोहली, सूर्यकुमार यादव, ऋषभ पंत, संजू सॅमसन, हार्दिक पंड्या (उपकर्णधार), शिवम दुबे, रविंद्र जडेजा, अक्षर पटेल, यजुवेंद्र चहल, कुलदीप यादव, अर्शदीप सिंग, जसप्रीत बुमराह, मोहम्मद सिराज.

विकेटकीपर म्हणून संघात ऋषभ पंत सोबत संजू सॅमसन याला संधी देण्यात आली आहे. चेन्नई सुपर किंग्जकडून धमाकेदार फलंदाजी करणाऱ्या शिवम दुबेला वर्ल्डपकची लॉटरी लागली आहे.

गोलंदाजीचे नेतृत्व जसप्रीत बुमराहकडे असेल त्याला मोहम्मद सिराज आणि अर्शदीप सिंग यांची साथ असेल. तर फिरकीपटूंमध्ये अक्षर पटेल, कुलदीप यादव आणि युजवेंद्र चहल यांना ऑलराउंडर रविंद्र जडेजाची सोबत असेल. वर्ल्डकपसाठी कालच न्यूझीलंडने संघाची घोषणा केली होती. त्यानंतर आज भारताचा संघ जाहीर होण्याच्या काही तास आधी इंग्लंडने संघ जाहीर केला होता.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-30T10:43:10Z dg43tfdfdgfd