हरता हरता मुंबईचा संघ जिंकला, रोहित हार्दिकच्या मदतीला धावला आणि विजय साकारला

मोहाली : सूर्यकुमार यादवची झंझावाती फलंदाजी आणि जसप्रीत बुमराहच्या भेदक गोलंदाजीच्या जोरावर मुंबईने पंजाबच्या संघावर थरारक विजय साकारला. सूर्याने ७८ धावांची खेळी साकारली, त्याला रोहित शर्माची चांगली साथ मिळाली. त्यामुळेच मुंबई इंडियन्सच्या संघाला १९२ धावा करता आल्या. पंजाबचा संघ १९३ धावांचे आव्हान पूर्ण करण्यासाठी उतरला खरा, पण त्यांची ४ बाद १४ अशी अवस्था झाली होती. पण आशुतोष शर्माने २८ चेंडूंत २ चौकार आणि सात षटकारांच्या मदतीने ६१ धावांची खेळी साकारली आणि मुंबई इंडियन्सच्या नाकी नऊ आणले होते. त्यावेळी रोहित शर्मा हार्दिक पंड्याच्या मदतीला धावून आला आणि त्यामुळेच मुंबई इंडियन्सला हा सामना ९ धावांनी जिंकता आला.

सूर्यकुमार यादव आणि रोहित शर्मा या जोडीने दुसऱ्या विेकेटसाठी ७१ धावांची दमदार भागीदारी रचली. रोहित आणि सूर्या या दोघानांही पंचांनी बाद दिले होते. पण या दोघांनी डीआरअस घेतला आणि दोघांनाही जीवदान मिळाले. या जीवदानाचा मोठा फायदा रोहितला उचलता आला नाही. कारण रोहित शर्मा यावेळी ३६ धावांवर बाद झाला, यामध्ये २ चौकार आणि तीन षटकारांचा समावेश होता. रोहित बाद झाला तरी सूर्या मात्र पंजाबचा चांगलाच समाचार घेत होता.

सूर्याने अर्धशतक झळकावले आणि त्याने शतकाच्या दिशेने कूच केली. पण सूर्याला यावेळी शतक मात्र झळकावता आले नाही. सूर्याने यावेळी ७ चौकार आणि तीन षटकाराच्या जोरावर ७८ धावांची खेळी साकारली. सूर्या खेळत होता तेव्हा मुंबईचा संघ २०० धावा सहज करेल, असे वाटत होते. पण तो बाद झाल्यावर हार्दिक पंड्या, टीम डेव्हीड, रोमारिओ शेफर्ड हे लवकर बाद झाला आणि संघाला १९२ धावा करता आल्या.

मुंबईच्या १९३ धावांचा पाठलाग करण्यासाठी पंजाबचा संघ उतरला खरा, पण तीन षटकांतच त्यांना चार विकेट्स गमवाव्या लागल्या. जसप्रीत बुमराह आणि गेराल्ड कोत्झे यांनी प्रत्येकी दोन विकेट्स मिळवल्या. त्यावेळी पंजाबची ४ बाद १४ अशी दयनीय अवस्था झाली होती. पंजाबचा संघ यामधून बाहेर पडण्याचा प्रयत्न करत होता, पण यामध्ये त्यांना अपयश आले. शशांक सिंगने ४१ आणि आशुतोष शर्माने ६१ धावांची खेळी साकारली. पण तरीही त्यांना पंजाबला विजय मिळवून देता आला नाही.

मुंबई इंडियन्यचा हा या आयपीएलमधील तिसरा विजय ठरला आहे. यापूर्वी मुंबईने दोन सलग विजय मिळवले होते. पण गेल्या सामन्यात त्यांना चेन्नई सुपर किंग्जने पराभूत केले होते. त्यामुळे त्यांची विजयी हॅट्रीक हुकली होती. पण आता मुंबईचा संघ पुन्हा एकदा विजयाच्या मार्गावर यावेळी परतला आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-18T18:25:36Z dg43tfdfdgfd