सचिन तेंडुलकरचे चाहत्याला LIFE TIME गिफ्ट, दुर्धर आजाराशी लढणाऱ्या करणच्या आयुष्यात भरले आनंदाचे रंग

मुंबई : सचिन तेंडुलकर हा माणूस म्हणून किती महान आहे, याचा प्रत्यय पुन्हा एकदा सर्वांना आला. करण महाले हा २४ वर्षांचा तरुण एका दुर्धर आजाराने ग्रस्त आहे, ज्याला चालणंही शक्य नाही. करण सचिनचा चाहता आहे. सचिनला भेटण्याचे आपले स्वप्न आह, असे करणने त्याच्या आई-बाबांना सांगितले होते. सचिन निवृत्तीनंतरही किती व्यग्र आहे, याची कल्पना सर्वांनाच आहे. त्यामुळे सचिन आपल्याला भेटणार की नाही, ही शंका त्याच्या मनात होती. पण सचिनने या आपल्या चाहत्याची स्वत:हून भेट घेतली आणि त्याचे स्वप्न पूर्ण केले.

करण गेल्या २० वर्षांपासून 'डचेन मस्कुलर डिस्ट्रॉफी'ने त्रस्त आहे. हा एक अत्यंत दुर्मिळ प्रकारचा आजार आहे, ज्यामध्ये रुग्णांची स्नायूंची शक्ती कमी असते आणि जसे वय वाढत जाते तसशी ही शक्ती अजून कमी होत जाते. करणच्या पालकांनी सर्वतोपरी प्रयत्न केले, नानाविध उपचार केले, पण या आजारावर काहीच उपाय नसल्याचे त्यांना समजले. ज्यांना हा आजार असतो त्यांचे आयुर्मान हे २० ते २५ वर्षे एवढे असते. करणचे आई-बाबा त्याच्या सर्व इच्छा पूर्ण करण्याचा आणि त्याला जास्तीत जास्त आनंदी ठेवण्याचा प्रयत्न करत आहेत.

करणला भेटल्यावर सचिन त्याच्या आई-बाबांना म्हणाला की, " स्वप्न बघणं आणि ते पूर्ण होण यामध्ये ईश्वराची खूप मोठी कृपा असते . निश्चित वेळ आली की ती पूर्ण होतात. करण हा असा मुलगा आहे की त्याचं मन हे खूप निष्पाप, निरागस आणि पवित्र आहे. त्याला ना कोणाशी लोभ ना मत्सर. तुम्ही फार नशीबवान आहात की, करण तुमचा मुलगा आहे, त्याचा अभिमान बाळगा . तो आपल्या जीवनात असणं ही परमेश्वराची असीम आणि पवित्र भेट आहे . आज मी मनापासून खूप खूश आहे की, करणची इच्छा सगळ्यांच्या सहाय्याने आज पूर्ण झाली . परमेश्वर करणच्या सगळ्या ईच्छा पूर्ण करो."

करणचे वडिल किशोर महाले यांनी सांगितले की, " करणची सर्व प्रकारची वैद्यकीय काळजी आम्ही घेतली. दुर्दैवाने आजपर्यंत या आजारावर कोणतेही ठोस वैद्यकीय उपचार उपलब्ध नाहीत. करणने आमच्याकडे सचिन तेंडुलकर यांना भेटण्याची इच्छा व्यक्त केली होती. करणला सचिन यांना भेटायचे होते आणि त्यांच्याशी संवाद साधायचा होता. हे आमचे स्वप्न पूर्ण होईल की नाही, हे आम्हाला माहिती नव्हते. पण सचिन यांच्या पुढाकाराने ही गोष्ट अखेर पूर्ण झाली आणि करणची सचिन यांची भेट घेण्याचे स्वप्न अखेर सत्यात उतरले."

सचिनने या खास चाहत्याची भेट घेतली आणि सर्वांची मनं जिंकल्याचे पाहायला मिळाले. सचिनच्या या भेटीने करणचे आयुष्यातील एक मोठे स्वप्न अखेर साकार झाले.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-25T12:08:21Z dg43tfdfdgfd