FRENCH OPEN 2024 : जोकोव्हिचच्या विजयापेक्षा रात्रीच्या खेळाचीच चर्चा, पाहा नेमकं घडलं तरी काय

पॅरिस : सर्बियाचा अव्वल खेळाडू नोव्हाक जोकोव्हिच आता फ्रेंच खुल्या स्पर्धेचे जेतेपद जिंकेल, हे जवळपास स्पष्ट आहे. कारण लाल मातीचा राजा असलेला राफेल नदाल या स्पर्धेतून बाहेर पडला आहे. त्यामुळे जोकोव्हिचच्या विजयाची शक्यता सर्वात जास्त वाढली आहे. पण जोकोव्हिच्या विजयापेक्षा आता एका भलत्याच गोष्टीची चर्चा मात्र रंगताना दिसत आहे. नोव्हाकच्या विजयापेक्षा आता रात्रीच्या खेळाचीच जोरदार चर्चा रंगत आहे.

शनिवारी रात्री १०.३० वाजता सुरू झालेला त्याचा सामना संपेपर्यंत रविवारी पहाटेचे तीन वाजले. ग्रँडस्लॅम टेनिस स्पर्धेच्या कालावधीत तसेही सहभागी झालेल्या खेळाडूंना सामन्याच्या उत्सुकतेमुळे झोप लागत नाही. त्यात लढती अशा भल्या पहाटे संपू लागल्यास मिळत असलेली थोडीथोडकी झोपही अपूर्ण राहते आहे.

सध्याचे टेनिसपटू, माजी टेनिसपटू आणि पाठीराख्यांकडूनही याबाबतीत प्रतिक्रिया येत आहेत. खेळाडूंच्या झोपेच्या दृष्टीने जसे हे सामने अयोग्य, तसेच प्रेक्षकांच्या दृष्टीनेही असे पहाटेपर्यंत रंगणारे सामने थकविणारेच ठरतात. काही प्रेक्षक सामना संपेपर्यंत थांबतात, त्यानंतर प्रवास करत घर गाठणे अन् मग झोप घेत कामावार रुजू होणे हीदेखील तारेवरची कसरत ठरते आहे.

'हा सगळा प्रकारच क्लीष्ट आहे. अशा उशीरा संपणाऱ्या सामन्यांकडे बघताना सर्वप्रथम मला टेनिसपटूंच्या फिटनेसची काळजी वाटते. खेळाडू ठणठणीत राहिले तर ते खेळाच्या दृष्टिने चांगले असते. मला वाटते की सामन्यांच्या वेळा ठरविताना सामने संपण्याच्या वेळेचा अंदाजही घ्यावा. ठराविक वेळेनंतर सामने सुरू करू नयेत, ते पुढेही ढकलता येतील. अर्थात प्रदीर्घ रंगणाऱ्या सामन्यांवर आयोजकांचेही नियंत्रण नाही, जे आपण समजू शकतो', असा मुद्दा अमेरिकन ग्रँडस्लॅम विजेत्या कोको गॉफने उपस्थित केला.

विम्बल्डनमधील नियमानुसार रात्री ११पर्यंतच सामने होतात. एखादा सामना संपला नाही, तर तो थांबवून दुसऱ्या दिवशी घेतला जातो. मात्र त्याबाबतही दुमत आहे. अशा सामन्यात फॉर्मात असलेला खेळाडू त्याच स्थितीत सामन्याचा विजयी समारोप करण्यास उत्सुक असतो. सामना थांबविला, तर त्याची लय बिघडू शकते.

फ्रेंच ओपनमधील सकाळचे सत्र अकराच्या आधी सुरू करावे, असे काही जण सूचवित आहेत. मात्र एवढ्या सकाळी टेनिसपटू अन् प्रेक्षकांचीही गैरसोय होण्याची शक्यता आहे. तसेच काही जणांनी असेही सूचविले आहे की, पुरुष गटाचे सामने सर्वोत्तम पाच सेटऐवजी सर्वोत्तम तीन सेटचे व्हावेत. मात्र ग्रँडस्लॅम स्पर्धांतील आव्हान टिकविण्यासाठी सर्वोत्तम पाच सेटचे सामने कायम राखणे काहींना महत्त्वाचे वाटते.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-06-04T11:38:02Z dg43tfdfdgfd