कार्तिकला का नाही मिळणार टी-२० वर्ल्डकपमध्ये संधी, इरफान पठाणने सांगितलं मोठं कारण

नवी दिल्ली : दिनेश कार्तिक आयपीएलच्या यंदाच्या हंगामात जबरदस्त फॉर्ममध्ये असल्याचे दिसून आले आहे. आरसीबीकडून खेळत असलेल्या दिनेश कार्तिकने ७ सामन्यात २२६ धावा केल्या आहेत. पण या दमदार कामगिरीनंतरही त्याला टी-२० वर्ल्ड कपच्या संंघात संधी मिळणार नाही, असे मोठे वक्तव्य भारताचा माजी क्रिकेटपटू आणि समालोचक इरफान पठाणने केले आहे. कार्तिक फॉर्मात असला तरी त्याला टी-२० वर्ल्ड कपच्या संघात स्थान का मिळणार नाही, याचे कारणही इरफानने सांगितले आहे.

कार्तिक हा २०५ पेक्षा जास्त स्ट्राईक रेटने खेळत आहेत. कार्तिकने सनरायझर्स हैदराबादविरुद्ध ३५ चेंडूत ८३ धावांची खेळी करून कार्तिकने जूनमध्ये होणाऱ्या आगामी टी-२० विश्वचषकासाठी टीम इंडियात स्थान मिळवण्यासाठी दावेदारी सिद्ध केली आहे. टी-२० विश्वचषकासाठी कार्तिकची स्पर्धा ही ऋषभ पंत, संजू सॅमसन, केएल राहुल आणि जितेश शर्मा या खेळाडूंसोबत असणार आहे. पण या सर्वांपेक्ष कार्तिकने जास्त धावा केल्या आहेत, तरीही त्याला टी-२० वर्ल्ड कपच्या संघात का संधी मिळणार नाही, याचे कारण इरफानने स्पष्ट केले आहे.

कार्तिकबाबत इरफान पठाण म्हणाला की, " दिनेश कार्तिक हा एमएस धोनीच्या सावलीत खेळला आहे आणि म्हणूनच त्याला जास्त संधी मिळाली नाही. आता धोनी खेळत नाही, तर कार्तिकला भारतीय संघात स्थान मिळावे, असे चाहत्यांना वाटत आहे. पण त्यामुळे ऋषभ पंतसारख्या युवा खेळाडूवर अन्याय होऊ शकतो. त्यामुळे टी-२० वर्ल्ड कपमध्ये कार्तिकपेक्षा पंतला प्राधान्य दिले जाईल, असे मला वाटते. यापूर्वीही कार्तिकला वर्ल्ड कपमध्ये संधी दिली होती, पण त्यावेळी तो अपयशी ठरला होता. त्यामुळे यावेळी पुन्हा एकदा कार्तिकवर विश्वास ठेवून संधी दिली जाईल, असे मला तरी वाटत नाही."

वर्ल्ड कपच्या शर्यतीत संजू सॅमसनपेक्षा कार्तिक पुढे आहे. नुकताच भारताकडून जितेश शर्मा हा टी-२० सामन्यात यष्टीरक्षण करत होता. याबाबत इरफान म्हणाला, "भारतीय क्रिकेटने याआधी दिनेश कार्तिकला चान्स दिला आहे. पण ते संघाच्या फायद्याचे ठरले नाही. त्यामुळे निवज समिती ऋषभ पंतसारख्या युवा खेळाडूची विश्वचषकासाठी निवड करतील, असे मला वाटते. जेव्हाही कार्तिकला संधी मिळाली तेव्हा त्याने फारसे चांगले प्रदर्शन केले नाही, त्यामुळे ऋषभ पंतला विश्वचषकात घेऊन जायला हवे असे मला वाटते. कारण त्याने आतापर्यंत बऱ्याचदा संधीचे सोने केले आहे आणि तो युवा आहे. त्यामुळे त्याच्या नावाचा विचार वर्ल्ड कपसाठी होईल, असे मला वाटते."

दिनेश कार्तिक चांगल्या फॉर्मात आहे, पण तरीही त्याचा वर्ल्ड कपच्या संघात का समावेश करण्यात येणार नाही हे इरफानने सांगितले आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-17T13:54:28Z dg43tfdfdgfd