बेन स्टोक्स टी-२० वर्ल्ड कपमधून बाहेर, कारण वाचाल तर तुम्हीही म्हणाल मानलं यार...

नवी दिल्ली : इंग्लंडचा कसोटी कर्णधार बेन स्टोक्सने टी-२० विश्वचषकातून माघार घेण्याचा निर्णय आता जाहीर केला आहे. यावेळी बेन स्टोक्सने आपण टी-२० वर्ल्ड कप न खेळण्याचे जे कारण सांगितले आहे, ते सर्वात महत्वाचे आहे.

काही दिवसांपूर्वी बेन स्टोक्स हा भारताच्य दौऱ्यावर आला होता. त्यावेळी त्याच्याकडून चांगली कामगिरी झाली नव्हती. संघाचे कर्णधारपद भूषवताना त्याला मालिका जिंकता आली नव्हती. पण या मालिकेत एक गोष्ट पाहायला मिळाली, ज्यामुळे त्याने हा मोठा निर्णय घेतला असल्याचे आता समोर आले आहे.

स्टोक्स त्याच्या शाररिक आणि मानसिक तंदुरुस्तीला प्राधान्य देण्यासाठी टी-२० विश्वचषकातून माघार घेण्याचा निर्णय घेतला आहे. नुकत्याच एका निवेदनात स्टोक्स म्हणाला की, "मी कठोर परिश्रम घेत आहे आणि माझे लक्ष गोलंदाजी फिटनेस परत मिळविण्यावर आहे. जेणेकरून मी क्रिकेटच्या सर्व प्रकारात अष्टपैलू भूमिका बजावू शकेन." स्टोक्स जेव्हा भारताच्या दौऱ्यात आला होता, तेव्हा त्याला जास्त गोलंदाजी करता आली नव्हती. स्टोक्सच्या गुडघ्यांचे ऑपरेशन काही दिवसांपूर्वी झाले होते. त्यानंतर नऊ महिने तो गोलंदाजीपासून लांब राहीला. त्यानंतर भारताच्या दौऱ्यात त्याने थोडी गोलंदाजी केली खरी, पण तो चांगल्या लयीत नसल्याचे पाहायला मिळाले. त्यामुळे आपण जर गोलंदाजी करण्यासाठी फिट नसू तर संघात आपले स्थान असू शकत नाही, असा विचार स्टोक्सने यावेळी केला आहे. फक्त आपल्याकडे अनुभव आहे आणि त्यामुळे आपली संघातील जागा कायम असावी, असा अट्टाहास स्टोक्सने धरला नाही. उलटपक्षी स्टोक्स हा स्वत: टी-२० वर्ल्ड कपमधून बाहेर पडला आहे. त्यामुळे स्टोक्सने यावेळी एक उत्तम उदाहरण सर्वांसमोर ठेवले असल्याचे म्हटले जात आहे.

सध्या सर्व खेळाडू टी-२० क्रिकेट खेळायला प्राधान्य देतात. पण स्टोक्सने मात्र कसोटी क्रिकेटला प्राधान्य देण्याचे ठरवले आहे. इंग्लंडच्या कसोटी संघाचा तो कर्णधार आहे. टी-२० वर्ल्ड कपमध्ये निवड झाली तर स्टोक्स फक्त एक फलंदाज म्हणून खेळू शकतो. पण फक्त फलंदाज म्हणून न खेळता दुसऱ्या एका खेळाडूला टी-२० वर्ल्ड कपच्या संघात जागा मिळावी, अशी स्टोक्सची धारणा आहे.

स्टोक्सला २०१९, २०२० आणि २०२२ मध्ये विस्डेन आघाडीचा क्रिकेटपटू म्हणून घोषित करण्यात आले. त्याला सर्वोत्कृष्ट पुरुष क्रिकेटपटूचा आयसीसी पुरस्कार आणि २०१९ मध्ये बीबीसी स्पोर्ट्स पर्सनॅलिटी ऑफ द इयर पुरस्कार देखील मिळाला. एप्रिल २०२२ मध्ये त्याची इंग्लंडच्या कसोटी संघाचा कर्णधार म्हणून नियुक्ती करण्यात आली.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-02T13:15:51Z dg43tfdfdgfd