मुंबई की राजस्थान... पावसामुळे सामना थांबल्यावर कोण ठरणार विजेता, जाणून घ्या समीकरण...

जयपूर : मुंबई इंडियन्स आणि राजस्थान रॉयल्सच्या सामन्यात पावसाचे आगमन झाले. पाऊस पडला तेव्हा राजस्थानच्या डावाची ६ षटके झाली होती. त्यामुळे या सामन्याचा निकाल लागणे स्पष्ट होते. पण पावसामुळे सामना थांबल्यावर कोणता संघ विजयी ठरू शकतो, याचे समीकरण आता समोर आले आहे.

जेव्हा पाऊस पडला तेव्हा राजस्थानचा पहिला पॉवर प्ले संपला होता. त्यावेळी राजस्थानने ६ षटकांत बिन बाद ६१ अशी धावसंख्या उभारली होती. त्यावेळी यशस्वी जैस्वाल हा नाबाद ३१ धावांवर खेळत होता, तर जोस बटलरने २८ धावा केल्या होत्या. राजस्थानने या पॉवर प्लेमध्ये एकही विकेट गामवली नव्हती. पण दुसरीकडे मुंबई इंडियन्सची सुरुवात चांगली झाली नाही. रोहित शर्मा ६ धावांवर बाद झाला होता. ईशान किशनला तर खातेही उघडता आले नव्हते. सूर्यकुमार यादवला १० धावा करता आल्या होत्या. त्यामुळे मुंबई इंडियन्सची ३ बाद २० अशी धावसंख्या झाली होती. मुंबईची सुरुवात जरी चांगली झाली नसली तरी त्यानंतर तिलक वर्मा आणि नेहाल वधेरा यांनी ९९ धावांची दमदार भागीदारी रचली होती. त्यामुळे ३ बाद २० अशी मुंबईचा धावसंख्या जरी झाली होती तरी मुंबई इंडियन्सच्या संघाला १७९ धावांपर्यंत मजल मारता आली होती. त्यामुळे डकवर्थ लुईस समीकरण नेमके काय होते, याकडे सर्वांचे लक्ष लागलेले होते.

मुंबई इंडियन्सच्या संघाने ६ षटकांच्या पॉवर प्लेमध्ये ३ बाद ४५ अशी धावसंख्या उभारली होती. त्यामुळे पहिल्या ६ षटकांनंतर पाऊस पडला आणि त्यानंतर सामना होऊ शकला नाही तर डकवर्थ लुईस नियमानुसार राजस्थानने जर एकही विकेट गमावली नसेल तर त्यांच्यासाठी ४१ धावा विजयासाठी पुरेश्या ठरणार होत्या. राजस्थानची तर बिन बाद ६१ अशी स्थिती होती. त्यामुळे डकवर्थ लुईस नियमानुसार राजस्थानचा संघ हा मुंबई इंडियन्सपेक्षा २० धावांनी पुढे असल्याचे पाहायला मिळाले. त्यामुळे ६ षटकांनंतर पावसामुळे सामना होऊ शकला नाही तर राजस्थान रॉयल्सला विजयी घोषित केले जाऊ शकते.

मुंबई इंडियन्सची सुरुवात वाईट झाली, तर दुसरीकडे राजस्थानने झोकात सुरुवात केली. या गोष्टीचा फायदा यावेळी राजस्थानला नक्कीच मिळाला. कारण राजस्थानचा संघ हा पहिल्या ६ षटकांत मुंबईपेक्षा २० धावांनी पुढे असल्याचे समोर आले होते. त्यामुळे डकवर्थ लुईस नियमांनुसार राजस्थानचा संघ निश्चितपणे आघाडीवर होता.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-22T17:03:38Z dg43tfdfdgfd