PAT CUMMINS HAT TRICK: पॅट कमिन्सच्या हॅटट्रिकचा योगायोग, आता भारताला वर्ल्ड कप जिंकण्यापासून कोणी रोखू शकत नाही

T20 World Cup 2024 : ऑस्ट्रेलियाच्या पॅट कमिन्सने बांगलादेशविरुद्धच्या सुपर एट टप्प्यातील सामन्यात टी-२० विश्वचषकातील पहिली हॅटट्रिक घेतली. कमिन्सने 18व्या षटकातील शेवटच्या दोन चेंडूंवर महमुदुल्लाह आणि मेहदी हसन यांना बाद केले आणि त्यानंतर शेवटच्या षटकाच्या पहिल्या चेंडूवर तौहीद हृदयला पॅव्हेलियनमध्ये पाठवले. टी-२० विश्वचषकातील ही सातवी हॅट्ट्रिक ठरली.

कमिन्सने एकूण 29 धावांत तीन बळी घेतले. यापूर्वी ऑस्ट्रेलियाच्या ब्रेट लीने ही कामगिरी केली होती. लीने 2007 मध्ये बांगलादेशविरुद्ध हॅट्ट्रिक घेतली होती. इतर खेळाडूंमध्ये आयर्लंडचा कुर्तिस कॅम्फर (2021), श्रीलंकेचा वानिंदू हसरंगा (2021), दक्षिण आफ्रिकेचा कागिसो रबाडा (2021), UAEचा कार्तिक मयप्पन (2022), आणि आयर्लंडचा जोशुआ लिटिल (2022) यांनी हॅट्ट्रिक घेतली आहे.

ऑस्ट्रेलियाचा माजी वेगवान गोलंदाज ब्रेट लीने 2007 मध्ये टी-20 विश्वचषकाच्या इतिहासात पहिली हॅटट्रिक घेतली होती. बांगलादेशविरुद्धही त्याने हा चमत्कार घडवला. त्यावेळी ब्रेट लीने आपल्या स्पेलमध्ये केवळ 3 विकेट घेतल्या होत्या आणि भारताने तो विश्वचषकही जिंकला होता. पॅट कमिन्सने हॅटट्रिक घेतल्याने भारतासाठी विश्वचषक जिंकण्याचा रंजक योगायोग घडणार का याकडे आता सर्व भारतीय क्रिकेट रसिकांचे लक्ष लागले आहे.

"रोहित शर्माच्या नेतृत्वाखालील भारतीय संघाची या विश्वचषकात आतापर्यंतची कामगिरी उत्कृष्ट राहिली आहे. त्यांनी सुपर 8 मधील त्यांच्या पहिल्या सामन्यात अफगाणिस्तानलाही पराभूत केले आहे." भारतीय संघ 22 जूनला बांगलादेश आणि 24 जूनला ऑस्ट्रेलियाशी मुकाबला करणार आहे. भारताने सुपर 8 चा पहिला सामना 20 जून रोजी अफगाणिस्तानविरुद्ध खेळला. नाणेफेक जिंकून प्रथम फलंदाजी करताना भारतीय संघाने 20 षटकांत 8 विकेट गमावत 181 धावा केल्या. "प्रत्युत्तरादाखल अफगाणिस्तान 20 षटकात 134 धावांवर सर्वबाद झाले आणि टीम इंडियाने 47 धावांनी सामना जिंकला."

अशाप्रकारे पॅट कमिन्सने हॅटट्रिक घेणे भारतीय संघासाठी चांगले संकेत मानले जाऊ शकते. आता रोहित शर्माच्या नेतृत्वाखालील भारतीय संघ टी-20 विश्वचषकातील विजयाचा सिलसिला कसा कायम ठेवतो हे पाहायचे आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-06-21T06:30:50Z dg43tfdfdgfd