मुंबई: टी- २० वर्ल्डकपमधील २४वा सामना ऑस्ट्रेलिया आणि नामिबिया संघात सर व्हिव्हियन रिचर्ड्स स्टेडियमवर रंगला.ऑस्ट्रेलियाने नाणेफेक जिंकून प्रथम गोलंदाजी करत नामिबियाला केवळ ७२ धावांवर रोखले. ऑस्ट्रेलियन गोलंदाजांनी सामन्यात सुरुवातीपासून भेदक मारा सुरु ठेवला आणि केवळ १७व्या षटकातच नामिबियाला सर्वबाद केले आणि सलग तिसरा विजय मिळवला.
अँटिग्वा येथील सर व्हिव्हियन रिचर्ड्स स्टेडियमवर खेळल्या गेलेल्या ऑस्ट्रेलियाविरुद्ध नामिबिया सामन्यात ऑस्ट्रेलियाने पूर्णपणे स्वतःचे वर्चस्व नामिबियावर राखले. ऑस्ट्रेलियाच्या गोलंदाजांनी सुरुवातीपासूनच अटॅक सुरु ठेवल्याने नामिबियाने थोड्या थोड्या धावांनी बळी गमावले. नामिबियाने प्रथम फलंदाजी करत १४ धावांवर पहिला बळी गमावला. निकोलस डेव्हिन केवळ दोन धावा करून तिसऱ्या षटकाच्या चौथ्या चेंडूवर बाद झाला आणि नामिबियाला पहिला धक्का बसला.जॉन फ्रायलिंक चौथ्या षटकाच्या चौथ्या चेंडूवर केवळ १ धावा करून बळी गमावून माघारी परतला. मायकेल व्हॅन लिंगेनने १० धावा करून पाचव्या षटकाच्या पहिल्या चेंडूवर पव्हेलियनच्या दिशेने परतला.
नामिबिया संघाचा स्टार फलंदाज डेव्हिड विजे काही करिष्मा दाखवू शकला नाही केवळ १ धावा करून ११ व्या षटकाच्या तिसऱ्या चेंडूवर माघारी परतला. पुढे १३व्या षटकातील चौथ्या चेंडूवर रुबेन ट्रम्पलमॅनने ७ चेंडूत १ षटकाराच्या मदतीने ७ धावा करून आपला बळी गमावला. बर्नार्ड शॉल्ट्झ खाते न उघडता परतला तर कर्णधार गेरहार्ड इरास्मसच्या रूपाने संघाने नववी विकेट गमावली. गेरहार्डने एकाकी झुंज देत ४३ चेंडूंमध्ये चार चौकार आणि एक षटकाराच्या मदतीने ३६ धावा करत कर्णधाराला साजेशी खेळी खेळली. १७व्या षटकाच्या शेवटच्या चेंडूवर अखेरचा बळी संघाने बेन शिकोंगोच्या रूपात गमावला तर बेन खाते न उघडता पव्हेलियनच्या दिशेने परतला.
ऑस्ट्रेलियाकडून फलंदाजी करत डेव्हिड वॉर्नरने पहिला बळी २० धावा करून गमावला, त्यात त्याने ३ चौकार आणि १ षटकार ठोकला. ट्रेव्हिस हॅडने सर्वाधिक नाबाद ३४ धावा केल्या ज्यात त्याने ५ चौकार २ षटकार ठोकले. कर्णधार मिचेल मार्शने नाबाद १८ धावा केल्या ज्यात त्याने ३ चौकार आणि १ षटकार ठोकले आणि ऑस्ट्रेलियाने सलग तिसऱ्यांदा विजय मिळवला आणि थेट सुपर ८ फेरी गाठली. सुपर-८ ही फेरी गाठणारा ऑस्ट्रेलिया दुसरा संघ ठरला तर पहिला संघ हा दक्षिण आफ्रिका ठरला आहे.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-06-12T04:22:32Z dg43tfdfdgfd