नवी दिल्ली: भारतीय क्रिकेट संघ सध्या आयसीसी टी-२० वर्ल्डकप खेळत आहे. ग्रुप फेरीमध्ये भारताने पहिल्या ३ लढती जिंकून सुपर ८ फेरीत प्रवेश केला आहे. आज १५ जून रोजी ग्रुप फेरीतील भारताची अखेरची लढत कॅनडाविरुद्ध होणार आहे. पण त्याआधी टीम इंडियामधील एक मोठी बातमी समोर आली आहे.
टी-२० वर्ल्डकपसाठी जेव्हा भारतीय संघाची घोषणा झाली तेव्हा भारताचा आघाडीचा आणि युवा सलामीवीर शुभमन गिल याचे नाव मुख्य संघात नव्हते. गिल त्याच्या खेळीमुळे चर्चेत राहणारा सलामीवीर आहे. अशा स्टार खेळाडूला संघात न घेतल्याने चर्चा झाली. गिलचा समावेश राखीव खेळाडूंमध्ये करण्यात आला. आता असे वृत्त समोर येत आहे की भारताची ग्रुप फेरीतील अखेरची मॅच झाल्यानंतर तो पुन्हा मायदेशात परतणार आहे.
भारताच्या आतापर्यंत झालेल्या लढतीत शुभमन कधीच रोहित शर्मा किंवा अन्य खेळाडूंना सपोर्ट करताना दिसला नाही. राखीव खेळाडूंपैकी रिंकू सिंह, आवेश खान आणि खलील अहमद हे खेळाडू भारत-पाकिस्तान लढतीत खेळाडूंना पाठिंबा देताना दिसले होते.
आता ग्रुप स्टेजनंतर गिल आणि आवेश खान भारतात परत येणार असल्याचे समजते. कारण त्यांना फक्त अमेरिकेत एखाद्या खेळाडूला दुखापत झाली तर बदली म्हणून ठेवण्यात आले होते. मात्र सूत्रांनी दिलेल्या माहितीनुसार आयपीएलमध्ये गुजरात टायटन्सचे नेतृत्व करणाऱ्या गिलला मायदेशात परत पाठवण्याचे खरे कारण हे अनुशासनात्मक आहे. अमेरिकेत गिल भारतीय संघासोबत दिसलाच नाही. इतक नाही तर अशी बातमी समोर येत आहे की, तो भारतीय संघापासून वेगळाच होता. कदाचीत अन्य कामात बिझी होता.
या सर्व घटनेत आणखी एक ट्विस्ट समोर आला आहे. ज्यात गिलने इस्टाग्रामवर भारताचा कर्णधार रोहित शर्माला अनफॉलो केले आहे. तो रोहितला आता इंस्टावर फॉलो करत नाही. एकूणच या सर्व प्रकरणावरून भारतीय संघ आणि शुभमन गिल यांच्यात सर्व काही ठीक नसल्याचे दिसत आहे. गिलने गेल्या वनडे वर्ल्डकपमध्ये चांगली कामगिरी केली होती. मात्र यावेळी त्याला टी-२० वर्ल्डकपमध्ये स्थान मिळाले नाही. आता समोर आलेले वृत्त खरे आहे का हे पाहणे उत्सुकतेचे ठरणार आहे.
२४ वर्षीय शुभमनने भारतीय संघाकडून आतापर्यंत २५ कसोटी, ४४ वनडे, १४ टी-२० सामने खेळले आहेत. यात त्याच्या नावावर कसोटीत १ हजार ४९२, वनडेत २ हजार २७१ आणि टी-२२० मध्ये ३३५ धावा आहेत.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-06-15T10:04:33Z dg43tfdfdgfd