SAURABH NETRAVALKAR: सौरभ नेत्रावळकर पूर्ण वर्ल्डकप खेळणार का ? वर्ल्डकप खेळण्यासाठी नोकरीवरुन घेतली आहे इतक्या दिवसांची सुट्टी
मुंबई: टी-२० वर्ल्डकप आता रंगत असून अनेक सामने अटीतटीचे होताना दिसत आहे तर काही सामन्यात सुपर ओव्हरचा थरार रंगताना दिसत आहे. टी-२० वर्ल्डकप २०२४च्या अ गटातील सामन्यात अमेरिकेने पाकिस्तानला सुपर ओव्हरमध्ये पराभूत करून इतिहास रचला. या सामन्यात खऱ्या अर्थाने हिरो ठरला तो सौरभ नेत्रवाळकर. सुपर ओव्हरमध्ये दमदार गोलंदाजी करणारा सौरभ क्रिकेटर सोबतच एक इंजिनियरही आहे, अमेरिकेत तो सॉफ्टवेअर इंजिनियरची नोकरीही करतो आणि सध्या त्याने वर्ल्डकपसाठी सुट्टी काढली असल्याची चर्चा रंगात आहे.
सुपर ओव्हरमध्ये सौरभ ठरला हिरो
अमेरिकाविरुद्ध पाकिस्तान सामना टेक्सासमधील ग्रँड प्रियरी स्टेडियमवर खेळला गेला. सुपर ओव्हरमध्ये प्रथम फलंदाजी करणाऱ्या अमेरिकेने १८ धावा केल्या तर प्रत्युत्तरात पाकिस्तानचा संघ सहा चेंडूत १ बळी गमावून केवळ १३ धावा करू शकला. ३२ वर्षीय मुंबईकर सौरभ नेत्रवाळकरने सुपर ओव्हरमध्ये अप्रतिम गोलंदाजी करत अवघ्या १३ धावा देत अमेरिका संघाला ऐतिहासिक विजय मिळावून दिला.मुंबई ते अमेरिकेचा प्रवास
सौरभ डावखुरा वेगवान गोलंदाज असून २०१०मध्ये अंडर-१९ वर्ल्डकपमध्ये ही तो भारतीय संघात होता तेव्हा सौरभसोबत संघात के एल राहुल, मयंक अग्रवाल सारखे सहखेळाडू होते. २०१३ मध्ये मुंबईसाठी सौरभने पदार्पण केले होते त्यानंतर त्याला जास्त सामने खेळायला मिळाले नाही आणि मास्टर्ससाठी विद्यापीठाकडून शिष्यवृत्ती मिळाल्यावर सौरभने अमेरिका गाठली. अमेरिकेला जाऊन सॉफ्टवेअर इंजिनिअरचे शिक्षण घेतले आणि नंतर तिथेच स्थायिक होऊन नोकरी करायला लागला. सौरभ व्यवसायाने सॉफ्टवेअर इंजिनिअर असल्याने स्वतःचे क्रिकेट ॲप तयार केले तर सौरभ सध्या ओरॅकलमध्ये तांत्रिक स्टाफचा प्रमुख सदस्य आहेत. क्रिकेटसोबतच तो नोकरीही करतो.सोशल मीडियावर व्हायरल झालेल्या फोटोनुसार, सौरभ नेत्रावळकरने टी- २० वर्ल्डकपसाठी नोकरीतून १७ जूनपर्यंत सुट्टी घेतली आहे परंतु अमेरिकेची कामगिरी बघता संघ सुपर ८ मध्ये पोहोचण्याची शक्यता नाकारू शकत नाही आणि त्यामुळे कदाचित नेत्रावळकरला त्याची सुट्टी वाढवावी लागेल.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-06-07T06:03:54Z dg43tfdfdgfd