HARDIK PANDYA: ‘मी पळ काढणार नाही...’, खडतर प्रवासावर हार्दिक पंड्या स्पष्टच बोलला, म्हणाला...

मुंबई : टीम इंडियाचा स्टार अष्टपैलू हार्दिक पंड्यासाठी इंडियन प्रीमियर लीगचा हंगाम फारसा प्रभावी ठरला नाही. मुंबई इंडियन्सचा कर्णधार म्हणून हार्दिक मैदानावर उतरला पण फलंदाजी तसेच गोलंदाजीत प्रभाव पाडू शकला नाही. आयपीएलमधील सुमार कामगिरीनंतर हार्दिक बांगलादेशविरुद्ध वर्ल्डकप सराव सामन्यात प्रथम मैदानावर उतरला. या सामन्यात हार्दिक पुन्हा फॉर्ममध्ये दिसला, तर सामन्यानंतर हार्दिकने पहिल्यांदा मौन सोडत कठीण काळावर भाष्य केले.

हार्दिकचा जोरदार कमबॅक

टी-२० वर्ल्डकपपूर्वी टीम इंडिया बांगलादेशविरुद्ध सराव सामना खेळला ज्यात हार्दिकने जबरदस्त कामगिरी करत विरोधकांना सडेतोड उत्तर दिले आणि २३ चेंडूत दोन चौकार आणि चार षटकार मारत ४० धावा ठोक्या. आयपीएलमध्ये खराब फॉर्ममध्ये दिसणाऱ्या हार्दिकने बांगलादेशविरुद्धच्या दमदार फलंदाजी केली. सध्या वैयक्तिक आयुष्याबद्दल सगळीकडे बरीच चर्चा होत असताना हार्दिकने अखेर मौन सोडले.

कठीण काळाबद्दल हार्दिक म्हणाला...

हार्दिक म्हणाला, "मी कठीण परिस्थितीपासून पळ काढणार नाही तर लढत राहणार, मला वाटतं की लढणं गरजेचे आहे. काही वेळा आयुष्य तुम्हाला अशा परिस्थितीत आणतं की जिथे गोष्टी खडतर असतात, मात्र, मला वाटतं की तुम्ही मैदान किंवा खेळ सोडून देता तेव्हा सगळंच अवघड होऊन बसतं, तुम्हाला काहीच मिळतं नाही."

"हे सर्व माझ्यासाठी अवघड ठरत असलं तरी मी यातून सामोरे जाणार, मी ज्या गोष्टींना यापूर्वी फॉलो करत आहे तसंच आतासुद्धा करणार, चांगला किंवा वाईट काळ असतो, हे टप्पे येतात आणि जातात, मी अशा प्रकारच्या काळातून अनेकदा गेलो आहे आणि यातून बाहेर देखील आलो आहे," पंड्या म्हणाला.

उपकर्णधारपदाबद्दल हार्दिक म्हणाला..

टी -२० वर्ल्डकपसाठी टीम इंडियाचा उपकर्णधार झाल्याबद्दल हार्दिक म्हणाला, "मी यशाला फारसं गांभीर्याने घेत नाही, मी जे चांगलं केलं आहे ते लवकर विसरुन जातो आणि पुढं जातो, वाईट काळात देखील असचं करतो आणि मला वाटतं की हा वाईट काळ निघून जाईल. तुम्ही खेळत राहा, तुमचं कौशल्य सुधारत आहे याचा स्वीकार करा, कठोर मेहनत करत राहा, ती कधी वाया जात नाही आणि हसत राहा."

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-06-03T04:18:17Z dg43tfdfdgfd