केन विल्यमसनने घेतला मोठा निर्णय; "मी असमर्थ आहे म्हणतं.. कर्णधारपदावरून पायउतार

मुंबई: टी-२० वर्ल्डकप २०२४ न्यूझीलंडच्या टीमसाठी काही फारसा चांगला गेला नाही. केन विल्यमसनच्या नेतृत्वाखाली आयसीसी टी-२० वर्ल्डकप २०२४ मध्ये न्यूझीलंडची टीम सुपर-८ मध्येही स्थान निश्चित करू शकली नाही. न्यूझीलंडला लीग स्टेजच्या सामन्यात अफगाणिस्तान आणि वेस्ट इंडिजविरुद्ध लाजिरवाण्या पराभवालाही सामोरे जावे लागले होते आणि या सगळ्यामुळे आता न्यूझीलंड संघाचा कर्णधार केन विलियम्सनने एक मोठा निर्णय घेतला आहे.

टी-२० वर्ल्डकपच्या इतिहासात हे बहुदा हे पहिल्यांदाच घडले आहे, न्यूझीलंडच्या टीमला लीग स्टेजच्या पुढच्या टप्प्यातही मजल मारता आली नाही. अशातच ही बाब लक्षात घेऊन कर्णधार विलियम्सनने एक मोठा निर्णय घेतला आहे तो म्हणजे असा की, विल्यमसनने टेस्ट क्रिकेटसह परदेशी फ्रँचायझी लीगमध्ये खेळता यावे यासाठी न्यूझीलंड क्रिकेट बोर्डाच्या खेळाडूचा सेंट्रल कॉन्ट्रॅक्ट सोडण्याचा निर्णय घेतला आहे.

न्यूझीलंड क्रिकेट बोर्डाने जारी केलेल्या निवेदनात म्हटले आहे की, "खेळाडूंचा सेंट्रल कॉन्ट्रॅक्ट सोडण्यासोबतच केनने व्हाईट बॉलच्या फॉरमॅटमधील टीमचे कर्णधारपदही सोडले आहे, राष्ट्रीय टीम आणि देशांतर्गत सुपर स्मॅशच्या सामन्यांसाठी न्यूझीलंड टीमच्या राष्ट्रीय करारामध्ये समाविष्ट असलेले खेळाडू उपलब्ध असणे गरजेचे आहे."

केन विलियम्सन कर्णधारपद सोडण्याच्या निर्णयावर म्हणला..

या निर्णयावर केन विलियम्सन म्हणाला की, "टीमला सर्व फॉरमॅटमध्ये पुढे नेताना मला आनंद झाला, मी भविष्यातही टीमला योगदान देत राहणार आहे, मी केंद्रीय करार स्वीकारण्यास असमर्थ आहे तर न्यूझीलंडसाठी खेळणे माझ्यासाठी खूप महत्त्वाचे आहे. मात्र, क्रिकेटबाहेरील माझे जीवन खूप बदलले आहे आणि मला आता माझ्या कुटुंबासोबत अधिक वेळ घालवायचा आहे."

विल्यमसनने याआधीच टेस्ट क्रिकेटमधील न्यूझीलंड टीमचे कर्णधारपद सोडले होते तर आता केनने व्हाईट बॉलच्या फॉरमॅटमटमधुनही कर्णधारपदही सोडले आहे. केन विलियम्सनने ९१ वनडे सामने आणि ७५ टी-२० सामन्यांमध्ये न्यूझीलंडच्या नेतृत्वाची जबाबदारी स्वीकारली होती. या कालावधीत संघाने ४७ वनडे सामने आणि ३९ टी-२० सामने जिंकलेत. केन विल्यमसनशिवाय न्यूझीलंड टीमचा वेगवान गोलंदाज लॉकी फर्ग्युसननेही स्वत:ला सेंट्रल करारातून बाहेर ठेवण्याचा निर्णय घेतला आहे तर गोलंदाज ट्रेंट बोल्टने तर चक्क निवृत्ती जाहीर केली आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-06-19T03:58:28Z dg43tfdfdgfd