गावस्करांनी हार्दिकवर तोफ डागत मुंबई इंडियन्सला आरसा दाखवला, नेमकं काय म्हणाले पाहा...

मुंबई : हार्दिक पंड्याचं नेमकं चाललंय तरी काय, हा प्रश्न आता सर्वांनाच पडला आहे. त्यामध्येच भारताचे माजी कर्णधार आणि समालोचक सुनील गावस्कर यांनी हार्दिकवर तोफ डागत मुंबई इंडियन्सला आरसा दाखवला आहे. आपल्या स्पष्टवक्तेपणासाठी गावस्कर ओळखले जातात. त्यामुळे गावस्कर यांनी स्पष्टपणे यावेळी मुंबई इंडियन्सला वॉर्निंगच दिली आहे.

हार्दिकने जेव्हापासून मुंबई इंडियन्सचे कर्णधारपद स्विकारले आहे, तेव्हापासून तो जोरदार ट्रोल होत आहे. सर्वात महत्वाची गोष्ट म्हणजे हार्दिकच्या नेतृत्वाचा संघावरही वाईट परीणाम झाला आहे. मुंबईने या आयपीएलमध्ये आठ सामने खेळले आहेत आणि त्यांना पाच पराभव पत्करावे लागले आहेत. त्यामुळे आता त्यांचा प्ले ऑफचा मार्ग बिकट बनला आहे. त्यामुळे मुंबईच्या संघाचे आयपीएलमधील आव्हान संपुष्टात येणार असल्याचे म्हटले जात आहे. पण त्याचवेळी सुनील गावस्कर यांनी स्पष्ट शब्दांत मुंबई इंडियन्सला वास्तव दाखवलं आहे.

गावस्कर यांनी स्टार स्पोर्ट्सवरील एका कार्यक्रमात सांगितले की, " मी २००८ सालापासून मुंबई इंडियन्सच्या संघाला फॉलो करत आहे. गेली १७ वर्षे मी मुंबई इंडियन्सच्या संघाला पाहत आलो आहे. या संघातील मोठे बदलही मी पाहिले. पण सध्याच्या घडीला हा संघ नेमका कोणता आहे, हेच मला कळत नाही. ज्या मुंबई इंडियन्सच्या संघाला मी ओळखत होतो, तो हा संघ नक्कीच नाही." मुंबई इंडियन्सच्या संघाची एक दबदबा होता, तो आता राहीलेला नाही, असेच दिसत आहे. गावस्कर यांनी ही गोष्ट दाखवून दिली आहे. कारण मुंबई इंडियन्सला पराभव काही नवीन नाहीत, पण संघातील वातावरण मात्र चांगलेच दिसत नाही आणि हीच गोष्ट गावस्कर यांनी निदर्शनास आणून दिली आहे. त्यामुळे गावस्कर यांनी न बोलता अप्रत्यक्षपणे मुंबई इंडियन्सच्या संघाला वॉर्निंगच दिली आहे. मुंबई इंडियन्सने जर कर्णधार बदलला नाही तर यापुढे अजून वाईट दिवस त्यांना पाहावे लागू शकतात, असे चाहतेही म्हणत आहेत.

मुंबई इंडियन्सने कर्णधार बदलला आणि त्यांच्या संघाचा चेहराच बदलल्याचे म्हटले जात आहे. त्यामुळे मुंबई इंडियन्सचा संघ कर्णधार बदलण्याचा निर्णय घेणार का, याची उत्सुकता सर्वांना असेल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-23T15:21:50Z dg43tfdfdgfd