RISHABH PANT: ऋषभची गुडघेदुखी ठरली आफ्रिकेसाठी डोकेदुखी; फलंदाजीत फ्लॉप ठरलेला पंतने कसा जिंकवला सामना; जाणून घ्या...
बार्बाडोस: टीम इंडियाने या वर्ल्ड कपमध्ये विजयी घौडदौड सुरुवातीपासूनच सुरु ठेवली आणि अखेर ती वर्ल्ड कप जिंकवूनच संपवली. तब्बल १७ वर्षानंतर रोहितच्या नेतृत्वात भारताने ट्रॉफीचा दुष्काळ संपवला. नाणेफेक जिंकून प्रथम फलंदाजी करताना सुरुवातीला भारतीय फलंदाजांना शर्थीचे प्रयत्न करावे लागले तर ऋषभ पंत तर शून्यावर बाद होऊन परतला. फलंदाजीत जरी ऋषभ फ्लॉप ठरला असला तरीही त्याच्या एका कामगिरीमुळे भारताला सामना पलटवण्यात मोठा फायदा झाला.
ऋषभची गुडघेदुखी दक्षिण आफ्रिकेसाठी ठरली डोकेदुखी
दक्षिण आफ्रिकेच्या डावातील १६ व्या षटकानंतर सामना थांबवावा लागला कारण होते ऋषभ पंतच्या गुडघेदुखीचे. फिजिओने मैदानात येऊन पंतवर उपचार केले आणि त्याच्या उजव्या गुडघ्यावर पट्टी लावली. ऋषभच्या उपचारासाठी थांबवावा लागलेला सामना भारतासाठी वरदान ठरला. गोलंदाजांवर बरसणारा दक्षिण आफ्रिकेच्या हेन्रिक क्लासेनच्या फलंदाजीला ऋषभच्या दुखापतीमुळे ब्रेक लागला. यानंतर खेळ सुरू झाला तेव्हा पहिल्याच चेंडूवर क्लासेन हार्दिक पंड्याचा ऋषभ पंतकरवी बळी ठरला.ऋषभच्या झेलने आफ्रिकेचा खेळ खल्लास केला
खेळ सुरु झाल्यानंतर संथ चेंडू कापण्याचा प्रयत्न करत असताना चेंडू बॅटची कड घेऊन पंतच्या हातात गेला आणि हार्दिकने महत्वाची विकेट घेतली. या विकेटसह भारतने हा सामना जवळ जवळ स्वतःच्या नावावर केला. क्लासेन २७ चेंडूत ५२ धावा करून परतला आणि भारताने आपल्या बाजूने बाजी पालटली. ऋषभच्या गुडघे दुखीमुळे आफ्रिका संघाच्या डोकेदुखीत वाढ झाली. ऋषभ या सामन्यात शून्यावर परतला परंतु महत्त्वाचा झेल घेऊन १४० कोटी भारतीयांना सुखद धक्का दिला.२०२२ला ऋषभचा गंभीर अपघात झाला होता आणि त्या अपघातामुळे त्याला तब्बल १५ महिने क्रिकेटपासून दूर राहावे लागले. या अपघातानंतर त्याच्या गुडघ्यावर सर्जरी करण्यात आली आणि आंतरराष्ट्रीय क्रिकेटमध्ये त्याने कमबॅक केला तो थेट वर्ल्ड कपमध्येच. या वर्ल्ड कपमध्ये ऋषभने सतत कामगिरी केली नाही परंतु मोक्याच्या सामन्यात चमकदार कामगिरी करून भारताच्या विजयात महत्त्वाचे योगदान दिले.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-06-30T10:01:05Z dg43tfdfdgfd