SMRITI MANDHANA:स्मृती मानधनाने केला मोठा विक्रम;दक्षिण आफ्रिकेविरुद्ध सलग दुसऱ्या सामन्यात शतकी खेळीसह रचला इतिहास
मुंबई: टीम इंडियाची स्टार फलंदाज आणि सलामीवीर स्मृती मानधनाने दक्षिण आफ्रिकेविरुद्ध सामन्यात पुन्हा एकदा अप्रतिम फलंदाजीचे प्रदर्शन केले. दक्षिण आफ्रिकेविरुद्ध सुरू असलेल्या वनडे मालिकेतील दुसऱ्या सामन्यातही मानधनाने शतक झळकावले. बेंगळुरूच्या चिन्नास्वामी स्टेडियमवर मानधनाने १०३ चेंडूत शतक झळकावले. स्मृतीच्या एकदिवसीय कारकिर्दीतीलहे सातवे शतक आहे. या शतकासह मानधनाने एक मोठा विक्रम आपल्या नावावर केला.
स्मृतीने रचला इतिहास
दक्षिण आफ्रिकेविरुद्ध मागील सामन्यातही मानधनाने अप्रतिम फलंदाजी करत शानदार शतक झळकावले होते. मानधनाने ११७ धावा करत टीम इंडियाला १४३ धावांच्या मोठ्या फरकाने जिंकवले होते. सलग दोन वेळा एकदिवसीय शतके झळकावणारी मानधना ही पहिली भारतीय महिला क्रिकेटपटू आहे. स्मृतीने वनडेमध्ये सात शतके झळकावली असून यासह तिने माजी भारतीय कर्णधार मिताली राजची बरोबरी केली आहे. वनडेमध्ये सात शतके झळकावणारी मानधनाही पहिली भारतीय सलामीवीर ठरली. स्मृतीने केवळ ८४ सामन्यांमध्ये सात वनडे शतके ठोकली तर मितालीला सात शतके झळकावण्यासाठी २११ सामने खेळावे लागले. हरमनप्रीत कौर ५ शतकांसह या यादीत तिसऱ्या क्रमांकावर आहे.
बंगळुरूच्या संथ खेळपट्टीवरही टीम इंडियाची सुरुवात संथ गतीने झाली आणि टीम इंडियाला पहिल्या १० षटकात केवळ २८ धावा करता आल्या. टीम इंडियाच्या ५० धावा १७षटकात पूर्ण झाल्या. मात्र, यानंतर स्मृती आणि हेमलता यांनी वेगवान फलंदाजी करत ५० धावांची भागीदारी केली. स्मृतीने ६७ चेंडूत आपले अर्धशतक झळकावले तर हेमलताची विकेट पडल्यानंतर स्मृतीने कर्णधार हरमनप्रीतसह पदभार स्वीकारला. या दोघींनी अफलातून फलंदाजी करत अवघ्या १९ चेंडूंत शतकी भागीदारी करून दक्षिण आफ्रिकेला मागे टाकले. हरमनप्रीतने ५८ चेंडूत अर्धशतक झळकावले.
दक्षिण आफ्रिकेच्या एकही गोलंदाजाला भेदक मारा करता आला नाही. नॉनकुलुलेको मलाबाला दोन विकेट घेण्यात यश मिळाले तिच्याव्यतिरिक्त सर्व गोलंदाज अपयशी ठरले. भारतीय संघ सलग दुसरा सामना जिंकून मालिका विजय करण्याच्या प्रयत्नात आहे.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-06-20T04:02:06Z dg43tfdfdgfd