T20 CRICKET: भारताच्या साहिलने टी-२० क्रिकेटमध्ये रचला इतिहास, जगभरात अशी कामगिरी कोणीही केली नाही...

दिगंबर शिंगोटे : भारतात त्याचा जन्म झाला. त्याला लहानपणापासून क्रिकेटची आवड आहे. तो हरयाणातील गावात भरपूर क्रिकेट खेळायचा. पण आता त्याच साहिल चौहानने आंतरराष्ट्रीय टी-२० क्रिकेटमध्ये इतिहास घडवला आहे. त्याने आंतरराष्ट्रीय क्रिकेटमध्ये अशी कामगिरी केली आहे, जी आतापर्यंत भल्याभल्या फलंदाजांना जमलेली नाही.

एकीकडे टी-२० वर्ल्ड कप सुरू असतानाही मूळच्या हरियाणाच्या साहिलने आपल्या विश्वविक्रमी कामगिरीने सर्वांचे लक्ष आपल्याकडे वेधून घेतले आहे. साहिलने सायप्रसविरुद्धच्या सामन्यात अवघ्या २७ चेंडूंतच शतक झळकावण्याचा पराक्रम केला आहे. त्याने २७ चेंडूंत पाच चौकार आणि तेरा षटकारांसह शतक साजरे केले. त्यापूर्वी, त्याने १४ चेंडूंतच अर्धशतक साजरे केले होते. अर्थात, पुढच्या तेरा चेंडूंतच त्याने शतक साजरे केले. ३० पेक्षा कमी चेंडूंत शतक झळकावणारा तो पहिलाच क्रिकेटपटू ठरला आहे.

आंतरराष्ट्रीय टी-२० क्रिकेटमध्ये सर्वांत वेगवान शतकाचा विक्रम यापूर्वी नामिबियाच्या जॅन निकोल लॉफ्टी इटनच्या नावावर होता. त्याने या वर्षी फेब्रुवारीत नेपाळविरुद्ध ३३ चेंडूंतच शतक साजरे केले होते. टी-२० क्रिकेटमध्ये वेगवान शतकाचा विक्रम ख्रिस गेलच्या नावावर होता. तो विक्रमही साहिलने मोडीत काढला आहे. आयपीएलमध्ये बेंगळुरूकडून खेळताना गेलने पुणे वॉरियर्सविरुद्ध ३० चेंडूंतच शतक साजरे केले होते. साहिलने या सामन्यात ४१ चेंडूंत सहा चौकार आणि अठरा षटकारांसह नाबाद १४४ धावांची खेळी केली. साहिल हा इस्टोनियाच्या संघाकडून खेळत आहे. साहिलचा संघ सायप्रस देशाच्या दौऱ्यावर आहे.

हॉटेलमध्ये काम...

साहिल मूळचा हरियाणातील मानकपूर देविलाल गावचा आहे. नातेवाईकामुळे तो इस्टोनियाला गेला. तेथे त्याच्या नातेवाईकाचा छोटा हॉटेल व्यवसाय आहे. तेथेच आता साहिल काम करतो. तेथे त्याने २०१९मध्ये क्रिकेट खेळण्यास सुरुवात केली. कंटाळा येत असल्याने साहिलने गुगलवर इस्टोनियात कोठे क्रिकेट खेळले जाते का, याचा शोध सुरू केला आणि त्यातूनच त्याचा आंतरराष्ट्रीय क्रिकेटकडे प्रवास सुरू झाला.

रोहितचा फॅन...

साहिल हा भारतीय कर्णधार रोहित शर्माचा फॅन आहे. साहिल म्हणतो, ‘रोहितला जेव्हा मी खेळताना पाहिले, तेव्हापासून मी त्याचा खूप मोठा चाहता आहे. कोणतीही आणि कशीही परिस्थिती असो, रोहित बिनधास्त खेळतो. तो दडपण घेत नाही. तो नेहमी स्वत:चा खेळ करतो. मी त्याला पाहून अनेक गोष्टी शिकलो आहे. त्याचा ‘हुक’चा फटका माझा ‘फेव्हरिट’ आहे.’

इस्टोनिया-सायप्रस संघांत एपिस्कोपीमध्ये सहा टी-२० सामन्यांची मालिका झाली. यातील एका सामन्यात साहिलने अविस्मरणीय कामगिरी केली.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-06-21T16:01:42Z dg43tfdfdgfd