सामना जिंकूनही दिल्लीकडून घडली मोठी चूक, ऋषभ पंतवर झाली कडक कारवाई

विशाखापट्टणम : दिल्ली कॅपिटल्सने रविवारी झालेल्या सामन्यात चेन्नई सुपर किंग्सवर दमदार विजय साकारला. दिल्लीचा हा पहिलाच विजय होता. पण या विजयानंतर दिल्लीच्या संघाकडून एक मोठी चूक घडल्याचे पाहायला मिळाले. ऋषभ पंतला यावेळी आपली चूक मान्य केली असून त्याच्यावर कडक कारवाई करण्यात आली आहे.

दिल्लीच्या या सामन्यात पंतने मोलाची भूमिका बजावली. कारण जेव्हा दिल्लीचा संग अडचणीत सापडला होता, तेव्हा पंतने अर्धशतक झळकावले आणि संघाला मोठी धावसंख्या उभारून दिली. त्यानंतर पंतने चाणाक्षपणे संघाचे नेतृत्व केले आणि संघाला विजय मिळवून देण्यात सिंहाचा वाटा उचलला. कारण पंतने यावेळ गोलंदाजांचा फार चांगला वापर केला. त्यामुळेच दिल्लीच्या संघाला हा विजय मिळवता आला. पण या विजयानंतर पंतवर कारवाई केल्याचे आता समोर आले आहे.

दिल्लीच्या या विजयानंतर सामनाधिकारी पंतला भेटले आणि या सामन्यात त्यांच्या संघाकडून कोणती चूक झाली हे सांगितले. या सामन्यात दिल्लीचा संघ हा निर्धारीत वेळेत तीन षटके मागे असल्याचे पाहायला मिळाले. त्यामुळे दिल्लीच्या संघाला अखेरच्या दोन षटकांत फक्त पाच खेळाडूच सीमारेषेवर ठेवता आले होते. त्याचबरोबर पंतने ही आपली चूक मान्य केली असून त्याच्यावर दिल्लीचा कर्णधार म्हणून कारवाई करण्यात आली आहे. यावेळी पंतच्या मानधनातून १२ लाख रुपयांचा दंड कापण्यात आला आहे. त्यामुळे दिल्लीच्या संघाला विजय मिळवता आला असला तरी त्यांच्याकडून या सामन्यात निर्धारीत वेळेत षटके न टाकण्याची चूक झाली आणि त्याचा फटका आता पंतला बसला आहे. षटकांची गती संथ राखल्यामुळे आता पंतवर ही कारवाई करण्यात आली आहे. आता पुढच्या सामन्यात दिल्लीच्या संघाला अजून सावध राहावे लागणार आहे.

कारण यापूर्वी जर दिल्लीच्या संघाकडून अशीच चूक झाली तर पंतवर २४ लाख रुपयांचा दंड ठोठावला जाईल आणि सर्व खेळाडूंला सामन्याच्या मानधनाची २५ टक्के रक्कम दंडाच्या स्वरुपात भरावी लागणार आहे. पण ही चूक तिसऱ्यांदा झाली तर कर्णधाराला ३० लाख रुपयांचा दंड आणि एक सामना खेळण्यापासून वंचित राहावे लागेल. त्याचबरोबर संघातील खेळाडूंना ५० टक्के रक्कम दंडाच्या स्वरुपात भरावी लागेल.

या आयपीएलमध्ये असा दंड भारावा लागणारा पंत हा दुसरा कर्णधार ठरला आहे. यापूर्वी गुजरात टायटन्सचा कर्णधार शुभमन गिलला यापूर्वी १२ लाख रुपयांचा दंड भरावा लागला होता.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-01T11:13:20Z dg43tfdfdgfd